De hominibus et locis “apricis” vel quomodo autumno resistam

“Apricus, aprica, apricum” est unum ex vocabulis Latinis quibus maxime delector (una cum verbo conjuncto, h. e. apricor, apricaris, apricari). Quod vel quae non multis annis abhinc comperui cum commentaria Servii in Aeneidem Vergilii scrutarer et Francogallice verterem. Tum de commentariis in Bucolica carmina agebatur. Hac autem aestate una cum collega meo probatissimo et carissimo Alban Baudou commentario in secundum librum Aeneidos rursus operam dedi cuius mox (speremus) in manus hominum dabimus textum Francogallica versione praeditum, necnon plurimis notis quae potissime ad res fabulosas pertinent. (Anno enim 2015 primus liber editus est c. t. fuit “A l’école de Virgile. Commentaire de Servius à l’Enéide, livre 1″.) Et in hac parte commentarii adjectivum “apricus, a, um” a Servio memoratur ut illustretur aliquid de alio adjectivo quod est “solemnis, is, e”. En verba Servii (ad Aen. 2, 202):

SOLEMNIS ARAS : anniuersario sacrificio religiosas. Dicimus autem et sacrificium ‘sollemne’ et aras ‘sollemnes’, ut ‘apricum’ et hominem et locum, ut aprici meminisse senes Persius, contra Horatius cur apricum oderit campum.

Ergo ut “solemnis” et de sacrificiis et de aris dici potest, ita “apricus” sive ad hominem sive ad locum referri licet. Nam non tantum locus sed homo “apricus” dici potest. Duo exempla afferuntur quorum primum mihi adrisit quia, dum Francogallice vertimus, unum verbum quaesivimus et quod tandem eligimus mirum mihi videtur. Adspicite:

SOLLEMNIS ARAS: [les autels] consacrés destinés au sacrifice annuel. Par ailleurs nous utilisons solemnis, « régulier », aussi bien pour un sacrifice que pour des autels, tout comme l’adjectif apricus, « plein de soleil », aussi bien pour un homme que pour un lieu : on trouve ainsi chez Perse aprici meminisse senes, « afin que les vieillards pleins de soleil [puissent] se rappeler » [Pers. V, 179] et au contraire chez Horace cur apricum oderit campum, « pourquoi il hait le Champ de Mars plein de soleil » [Hor., Carm. I, 8, 3-4].

Quin etiam in commentario quinti libri (v. 128) Servius adjectivum ipsum (“apricis”) tractat dicens:

Sane apricus et locus dicitur sole calens – quod est opaco et abdito contrarium – et apricos dicimus locis apricis gaudentes ; Vergilius ‘duceret apricis in collibus uua colorem’, Persius ‘nostra ut Floralia possint aprici meminisse senes’.

« À la fois, d’autre part, apricus se dit d’un lieu que le soleil réchauffe – ce qui est le contraire d’ombreux et caché – et nous désignons par aprici les lieux que le soleil enchante ; on trouve chez Virgile duceret apricis in collibus uua colorem, ‘qu’il colore la grappe sur les collines enchantées par le soleil’ [Virg., Buc. IX, 49], et chez Perse nostra ut Floralia possint aprici meminisse senes, ‘afin que les vieillards que le soleil enchante puissent se rappeler nos largesses’ » [Pers. V, 178-179].

Hi “vieillards pleins de soleil” qui in altero loco facti sunt (Francogallice, propter verbum gaudendi additum) “que le soleil enchante” cor meum laetitia vel… sole replent. Et adjectivum Latinum ipsum magis magisque diligo.

In hoc autem adjectivum incidimus cum rusticationem nostram (h.e. gregis “CLIO”) celebraremus initio mensis Iulii praeteriti. Et alios aliasque consodales scio id delectavisse. Quamobrem postea, cum dolore et maestitia afficerem in parva patria mea, propter incendia maxima quibus pulcherrima silva qua puella (atque etiam maior facta) tam saepe fructa sum fere tota deleta est, idem adjectivum consulto inscripsi in versione (omnino non polita) quam volui facere de illa cantilena quae Anglice “Hang on Little Tomato” vocatur. (Forte fortuna grex musicorum et cantatorum cantatricumque qui “Pink Martini” appellatur concentum egit prope illud oppidum meum.) Cum me ipsam illo cantu levavi, tum occurrit taeniolam quam incideram quantovis cum pudore tamen quasi munusculum ad consodales mittere posse. Nunc Latinitas vivae gratia (cui favendo plures taeniolas pelliculasque incidam) vocis meae minus me pudet. Quam si tamen aegre feretis, subito finem huius taeniolae petere poteritis ut verbum ipsum – “apricus” – audiatis!

---

Tum dies tibi mox continget apricus…

Hunc versum simplicius intellectura conabor hoc persuasum habere cum dies omnino non apricos vivere iam inceperimus.

Nunc vos salvere iubeo et spero me mox posse alia excerpta e Servii commentario praebere hic… aut in aliquo conventiculo gregis nostri. In proximum!

 

---

---